Maneira Rejistu Account Skrill (MoneyBookers)

Antes ita kontinua ba kontidu artiklu ne'e, karik Leitores seidauk hatene informasaun konaba Skrill (MoneyBookers) Autores sujere favor le'e artiklu "Rezumu Konaba Skrill (MoneyBookers)" mak postadu ona iha weblog ne'e.

Fasil tebes kuandu ita hakarak rejistradu nudar membru Skrill (MoneyBookers) no utiliza funsionalidades mak disponivel maibe ho rekizitus mak tenki kumpridu hanesan iha kraik ne'e:

• Email tenki ativu no validu
• Enderesu hela fatin tenki klaru no kompletu apropriadu ho kartaun identidade.

Tuir mai maneira rejistu account Skrill (MoneyBookers).

1. Asesu Ba Website Skrill

• Loke website Skrill iha enderesu https://www.skrill.com utiliza aplikasaun browser hanesan Mozilla Firefox ou Google Chrome.
• Depois mosu pajina prinsipal website Skrill, klik ba butaun "REGISTER" hanesan ezemplu imajen kraik ne'e.

2. Prense Informasaun Login Account
Depois mosu janela formulariu rejistrasaun, kontinua ense informasaun enderesu email no password apropriadu ho nesesidade. Email tenki validu no ativu, tamba enderesu email sei utilizadu nudar idetidade login (username) iha Skrill.

3. Prense Informasaun Privadu
Ense informasaun pesoal apropriadu ho kartaun Eleitoral, BI ou Pasaporte, ne'e importante tebes tamba relasionadu ho informasaun account ou rekening iha Skrill.

4. Prense Informasaun Nasionalidade & Moeda
Ense informasaun nasionalidade apropriadu ho kartaun Eleitoral, BI ou Pasaporte. Hili moeda mak utilizadu iha nasaun refere.

5. Prense Informasaun Hela Fatin
Ense informasaun enderesu uma, munisipiu, no mos kodigu postal. Enderesu hela fatin tenki apropriadu ho kartaun identitade.

6. Prense Informasaun Numeru Telefone
Hili kodigu telefone nasaun no ense numeru telefone. Numeru telefone tenki validu no ativu. Keta haluha hili opsaun "I'm not a robot". Kontinua klik ba butaun "OPEN ACCOUNT".

7. Account Skrill Aprovadu
Depois klik ba butaun "OPEN ACCOUNT" no mosu notifikasaun hanesan imajen tuir mai ne'e, signifika ita susesu ona rejistu account Skrill. Maibe antes login ba Skrill, ita tenki konfirma uluk link ativasaun mak enviadu ba email.

8. Verifikasaun Email
Loke inbox Email no hare'e email verifikasaun account mak enviadu husi kompania Skrill. Loke no klik deit ba link verifikasaun  refere (hare'e ezemplu imajen iha kraik ne'e).

9. Login ba Account Skrill
Login ba account Skrill ho maneira hatama username (enderesu email) no password. Kontinua ho klik ba butaun "Login".

10. Atualiza Informasaun Seguransa
Kuandu susesu login tama ba account Skrill, dahuluk ita tenki atualiza informasaun adisional konaba seguransa account Skrill. Hili ida husi opsaun mak disponivel refere. Pratika ne'e Autores hili "Create a PIN".

Kontinua ho kria 6 digitus Personal Identification Number (PIN) foun iha "Enter PIN" no konfirma fali PIN refere iha "Confirm PIN" (PIN tenki igual), no ikus klik butaun "Save".

Notas:
Personal Identification Number (PIN) nudar numeru konfidensial no keta fo hatene ba se'e deit, tamba PIN ne'e relasionadu direta ho kestaun seguransa adisional Ita-Boot nian account Skrill (MoneyBookers).

11. Tama Ba Dasboard Account Skrill
Depois atualiza informasaun adisional konaba seguransa, pajina prinsipal sistema dashboard Skrill sei mosu hanesan ezemplu imajen tuir mai. Iha etapa ne'e ita susesu ona rejistradu nudar membru account Skrill.

Notas:
Jeralmente ita bele ona utiliza Skrill para manda no simu osan maibe ho montante la liu husi $180.78 (informasaun ikus husi website Skrill), no kuandu transaksaun to'o ona montante mak determinadu, kompania Skrill sei husu kopia dokumentus kartaun BI ou Pasaporte no mos dokumentus seluktan karik nesesariu.  Prosesu verifikasaun account para bele aumenta ou hasa'e montante transaksaun Autores sei esplika iha postajen seluk.

To'o ne'e deit esplikasaun husi Autores konaba "Maneira Rejistu Account Skrill (MoneyBookers)". Esperadu kontidu husi artiklu ne'e bele ajuda Leitores mak seidauk hatene oinsa maneira rejistu account Skrill (MoneyBookers).

Obrigadu!