Jeffrey Preston Bezos & Amazon.com

Se'e mak la hatene ho website Amazon.com, sitiu kompras online mak popular no famozu iha mundu internet. Bodik-ba ita iha Timor-Leste, talves ema barak seidauk hatene ou seidauk akostumadu kompras utiliza website e-commerce hanesan Amazon. Maibe realmente kompras sasan iha website Amazon refere divertidu tebes, alende presu baratu no kuaze produtu hotu husi brand famozu disponivel, importante liu maka kualidade sasan garantidu no sasan ou produtu mak kompradu bele enviadu ba nasaun barak, ezemplu hanesan Timor-Leste.

Loja online gigante husi Estadu Unidus ne'e, estabelesidu iha fulan Maiu tinan 1994, no Jeffrey Preston Bezos nudar fundador loja online ne'e. Antes hari'i Amazon, tempu ne'eba Jeff Bezos nudar vise presidente kompania investimentu DE Shaw & Co, maibe finalmente nia husik kargu refere no hari'i kompania Amazon. Bezos hala'o negosiu Amazon husi garajen uma mak tempo ne'eba lokalizadu iha Bellevue, Washington.


Inisialmente Bezos somente foka ba area negosiu fa'an livru deit utiliza intermediariu internet. Maibe ho refinamentu teknolojia internet mak aumenta avansadu, Bezos konsiente katak kompania Amazon bele dezenvolve bo'ot liutan la'os deit fa'an livru, maibe bele mos sasan ou produtu seluk. Enforsu tomak husi Jeffrey Preston Bezos finalmente alkansa objetivu nudar loja online gigante iha mundu. Jeff Bezos rejistradu nudar ida husi inisiadores e-commerce iha mundu, no mos nudar loja online dahuluk mak rejistradu iha Wall Street.

Bazeadu dadus husi Forbes, tinan 2016, riku soin Jeff Bezos aumenta USD20 bilaun, no total riku soin Jeff atualmente total USD71,7 bilaun. No depois tinan 22, CEO Amazon ne'e susesu substitui pozisaun Warren Buffett, nudar ema riku numeru 1 iha Amerika.


Nudar informasaun deit, Jeff Bezos graduadu husi universidade Princeton nudar lisensiatura informatika no enjenaria eletrika iha tinan 1986 ho predikadu cum laude. Depois graduasaun, Bezos hahu tenta serbisu iha Wall Street, inklui Bankers Trust, Fitel, no kompania investe DE Shaw & Co. Iha ne'eba, responsavel nudar vise presidente kompania iha tinan 1990, no iha ne'eba mos Bezos hasoru MacKenzie.