Aprende Konaba Tipu Web Hosting

Jeralmente, disponivel 4 tipu web hosting mak presija ita hatene, tipu-tipu web hosting refere maka Shared Hosting, Virtual Private Server (VPS), Dedicated Server Hosting no Cloud Hosting. Kada tipu web hosting mai ho espesifikasaun no funsionalidades mak diferente, hahu husi presu, kuantidade espasu armazenamentu dadus, nivel seguransa, velosidade servidor no konfiabilidade, to'o funsaun kontrola servidor.

Le'e Mos :

• Infromasaun Baziku Konaba Domain & Web Hosting klik ne'e
• Provedores Web Hosting Konfiavel Iha Timor-Leste klik ne'e

Shared Hosting
Shared Hosting nudar tipu web hosting mak normalmente oferesidu ho presu baratu maibe ho funsionalidades mak limitadu.

Temi ho naran shared hosting, tamba fiziku servidor 1 utilizadu hamutuk (shared). Utilizador iha servidor 1 ne'e bele ho kuantidade nulu, atus, to'o rihun utilizador. No utilizador tomak sei utiliza rekursu servidor hanesan CPU no Memory hamutuk. Tamba servidor 1 utilizadu hamutuk, presu aluga mos asesivel.

Ho presu mak baratu, naturalmente ita mos konfrontadu ho problema prinsipal iha shared hosting, karik ida husi utilizador utiliza CPU servidor eksesivu, website tomak husi utilizador seluk iha servidor ida refere afeitadu mos. Solusaun bodik-ba problema ne'e, jeralmente provedores web hosting limita ona utilizasaun rekursu servidor kada utilizador.

Shared Hosting adekuadu bodik-ba ita mak foin komesa hari'i sitiu ou website hanesan blog pesoal, loja online no website ho kuantidade vizitante mak ladun barak kada fulan. Maibe Karik loron ruma vizitante sitiu ou website aumenta barak, ita bele husu ba provedores hosting para Upgrade ba tipu mak ho espesifikasaun altu liu hanesan VPS ou Dedicated Server.

Virtual Private Server (VPS)
VPS similariu ho shared hosting, fiziku servidor 1 utilizadu hamutuk. Maibe mak halo diferente kuantidade utilizador restritu no mos karik utiliza VPS rekursu servidor bo'ot liu, tantu CPU, RAM, espasu disku no mos bandwidth.

Utiliza VPS ita hanesan utiliza servidor ida rasik, tamba alokasaun rekursu CPU no RAM servidor sertu liu. Ho termu tekniku, alokasaun ne'e kunyesidu ho naran Virtualizasaun (diferente ho konseitu shared iha shared hosting).

Alende ne'e mos, ita bele kontrola total servidor,  no mos ita livre karik hakarak instala aplikasaun ou software saida deit sem prekupa utilizador seluk kona impaktu husi instalasaun software refere.

Karik vizitantes website ou sitiu atinji ona rihun vizitante kada loron,  Virtual Private Server adekuadu liu. Ho benefisiu mak kuaze similariu ho dedicated server hosting maibe ho presu mak asesivel no atuasaun diak liu komparadu ho shared hosting.

Dedicated Server Hosting
Dedicated Server Hosting nudar tipu hosting mak oferese servidor ida spesial bodik-ba utilizador ida. Ho nune'e, rekursu tomak servidor refere tantu CPU, RAM, no seluktan pertense ema ida no la fahe ho se'e deit.

Ho dedicated server hosting, ita bele kontrola total servidor no bele mos kontrola atividades tomak mak akontese iha servidor laran. Rekursu tomak husi servidor refere bele konfiguradu apropriadu ho nesesariu.

Tipu hosting ne'e adekuadu bodik-ba atividades trafiku dadus mak bo'ot, no mos bodik-ba sitiu ou website mak atende informasaun ou dadus-dadus privadu mak altamente sensitivu hanesan sitiu kompania, universidade, website negosiu online ou sitiu governu.

Barak benefisiu mak oferesidu husi dedicated server hosting refere, maibe presu aluga mos relativu karun liu husi shared hosting no VPS. Alende presu karun, abilidade no kunyesementu konaba tekniku mos altamente nesesariu.

Cloud Hosting
Ho dezenvolvimentu teknolojia cloud atualmente, mosu tipu web hosting foun hanesan cloud hosting. Iha tipu hosting ne'e, variu servidor (bele to'o rihun) mak interligadu no fornese funsaun komputasaun kombinadu. Ho nune'e, teknolojia Cloud Hosting permiti rekursu mak ilimitadu (Unlimited Bandwidth), no garantia website ho trafiku mak altamente bo'ot bele estavel nafatin.

Diferente ho tipu hosting hanesan shared hosting, VPS no dedicated server mak somente utiliza servidor ida deit. Karik servidor avaria, mate, ou problema seluktan mak halo servidor la la'o, website mak armazenadu iha servidor laran refere mos sei kona impaktu no la bele asesadu.

Maibe ho cloud hosting, wainhira akontese problema iha servidor, website mak armazenadu iha servidor refere sei trasnferidu / muda ba fali servidor seluk mak online ona. Ho nune'e, website bele asesadu kontinuamente no nungka offline.

Nudar tipu hosting mak relativu foun, seidauk barak provedores web hosting oferese tipu atendementu ne'e.

Managed & Unmanaged Server
Manage Server no Unmanaged Server normalmente enkontradu iha VPS no Dedicated Server.

Managed Server nudar servidor hosting mak suportadu diretamente husi ekipa tekniku provedores web hosting, tantu apoiu fornese informasaun no sujestaun sobre software mak utilizadu no mos apoiu bodik-ba rezolve variu problema mak bele akontese iha servidor hosting refere. Ho nune'e, ita la presija prekupa ou ulun moras ho kestaun tekniku iha servidor laran, maibe ita somente foka ba prosesamentu website deit. Presu managed server ne'e karun liu komparadu ho unmanaged server. Tamba servidor web resposavel husi provedores hosting, ho nune'e, presu managed server ne'e karun liu duke unmanaged server.

Unmanaged Server nudar servidor hosting mak ita rasik jere inklui instala aplikasaun mak nesesariu hanesan web server, cpanel, no seluktan. Alende instala aplikasaun, ita rasik mos mak rezolve problema software karik akontese iha servidor hosting refere. Provedores web hosting normalmente somente responsavel iha aspeitu fiziku hanesan eletrisidade no rede (network). Tamba la presija apoiu husi provedores web hosting, unmanaged server bele alugadu ho folin mak baratu liu komparadu ho managed server, maibe abilidade no kunyesementu kekniku konaba servidor hosting altamente nesesariu.

Colocation Server
Colocation Server maka tipu server ho fiziku dispotivu pertense (na'in) mak utilizador / kompania maibe kolokadu iha data center provedores web hosting. Apoiu husi provedores web hosting somente fornese deit eletrisidade no rede (network).

Kustu kada fulan Colocation Server normalmente la depende husi espesifikasaun servidor mak utilizadu tamba utilizador somente selu fatin aluga iha Data Center deit. Utilizasaun servidor ho espesifikasaun minimu ou sofistikadu la afeita kustu mensal.

Maibe wainhira utiliza colocation server, utilizador tenki responsavel rasik ho problema mak akontese iha dispotivu servidor refere.

---

To'o ne'e deit artiklu "Aprende Konaba Tipu Web Hosting" husi Autores, esperadu artiklu ne'e bele utilizadu nudar referensia estuda bodik-ba se'e deit mak hakarak hatene konaba mundu web hosting.

Obrigadu!

Artiklu ne'e resultadu koperasaun entre elovia.biz ho kalohan.net. Hetan diskontu adisional 10% karik kompra pakote hosting iha https://members.kalohan.net utiliza kodigu promo: "elovia.biz"