Diferensia Entre Kartaun Kreditu & Kartaun Debitu

Kuandu koalia konaba Kartaun Kreditu no Kartaun Debitu, kartaun rua ne'e nudar maneira transaksaun sem utiliza osan fiziku ( Non-Cash ) mak bele hafasil ita iha kada atividades transaksaun tomak, ho nune'e ita la presija ona hodi osan iha karteira laran.

Disponivel vantajen no desvantejen husi kartaun rua ne'e mak bele sai nudar referensia antes ita desidi ne'ebe mak hakarak ita uza.


Introdusaun Kartaun Kreditu
Kartaun kredit nudar instrumentu transaksaun Non-Cash ne'ebe fornesidu husi banku bodik ba pagamentu sasan ou servisu mak ne'ebe simu prosesu pagamentu ho kartaun kreditu, jeralmente utiliza EDC merchant ( Electronic Data Capture ). Karik hakarak kria Kartaun Kreditu la obrigatoriu tenki loke rekening banku, maibe tenki kumpri rekizitus mak fornesidu husi banku. Kartaun Kreditu mos bele temi ho naran Kartaun Tusan tamba kualker transaksaun ho Kartaun Kreditu sei ita selu iha fulan ou tinan ikus no jeralmente ema temi ho naran Pos-Pagu ( Post-Paid ).

Vantajen Kartaun Kreditu :

• Bele kompras konforme ita sem prekupa osan hotu, tamba osan mak disponivel iha kartaun kreditu maka osan husi banku mak orsida sei selu iha tempu mak determinadu ona.
• Ate agora kartaun kredit nudar kartaun transaksaun Non-Cash mak aseitavel iha ne'ebe deit, tamba kartaun kredit nudar produtu konfiavel husi banku.
• Disponivel oferta espesial mak normalmente oferese diskontu funan ou taxa juru husi banku. 

Desvantajen Kartaun Kreditu : 

• Disponivel taxa juru, tamba osan mak ita uza husi kartaun kredit maka osan imprestimu husi banku, karik tarde ita selu fatura, ita mos sei selu multa adisional.
• Osan la'os propriedade ita nian, ho nune'e diak liu transaksaun tuir apropriadu kondisaun finansas, tamba kuandu transaksaun ou kompras fora husi abilidade, no kbi'it laek para selu fatura, banku sei fo vista negativu no pior liu ita nian naran tama ba lista metan (Blacklist) banku. Mesmu as vezes disponivel termu “pagamentu minimu” maibe presija hare'e didiak taxa juru iha faturamentu sei aumenta a'as.

Introdusaun Kartaun Debitu
Kartaun debitu nudar instrumentu transaksaun Non-Cash ne'ebe fornesidu husi banku bodik ba pagamentu sasan ou servisu mak ne'ebe simu prosesu pagamentu ho kartaun debitu, jeralmente utiliza EDC merchant ( Electronic Data Capture ). Maneira kria kartaun debitu tenki loke rekening banku, rekizitu loke rekening iha banku la araska tamba somente fornese kartaun identidade ( Eleitoral / BI / Pasaporte ) no osan bodik ba saldo inisial. Kartaun debit bele rekarega saldo, tamba transaksaun hotu ho kartaun debit utiliza osan husi saldo rekening ita nian, ou jeralmente temi ho naran Pre-Pagu (Pre-Paid)

Vantajen Kartaun Debitu :

• Osan diretamente dedutivel / reduzidu husi saldo rekening, ho nune'e, ita bele kompras sem presija prekupa ho tusan tamba osan mak utilizadu husi saldo rekening rasik.
• Karik hakarak kria kartaun debit ita somente presija loke rekening sem presija aneksu rekizitu hanesan ezemplu fotokopia dokumentus konaba salariu.

Desvantajen Kartaun Debitu :

• Disponivel limitasaun atendementu, iha Timor-Leste kuaze banku hotu fornese limitasaun atendementu ba kartaun debit, ezemplu wainhira kompras ou transaksaun iha nasaun liur mak suporta kartaun debit Mastercard / Visa no seluk-seluktan. As vezes kartaun debit rejeitadu, hanesan mos bodik ba verifika atendementu online hanesan Paypal, Skrill, Neteller no seluktan.
• La bele kompras liu husi fundus mak disponivel iha rekening. Ezemplu ita hakarak kompras ou sosa telemovel ho folin $100, maibe iha saldo rekening menus husi $100, kondisaun refere sei afeita transaksaun rejeitadu tamba saldo la permiti.

To'o ne'e deit informasaun konaba diferensia Kartaun Kreditu no Kartaun Debitu, esperadu informasaun iha leten bele sai hanesan referensia ba belun sira hotu.